استخارہ کا مطلب ہے اللہ سے مشورہ کرنا۔ اللہ سے مشورہ کسی بھی جائز کام کے لیے کبھی بھی کیا جا سکتا ہے۔استخارہ کا شریعت نے مسنون طریقہ یہ بتایا ہے کہ دو نفل استخارہ پڑھ کر استخارہ کی دعا کرنی ہے۔ اس وقت تک یہ عمل روزانہ کرتے رہیں جبتک آپ پر سب واضح نہ ہو جاے یا آپ دل و دماغ سے مکمل طور پر کسی ایک طرف نہ ہو جائیں۔ ایسا ایک دن میں بھی ہو سکتا ہے اور کچھ دن تک بھی جا سکتا ہے۔ استخارہ کی دعا اتنی جامع دعا ہے کہ کیا بات ہے۔ جو بہتر ہے وہ آسان کر دے، مقدر کر دے اور برکت ڈال دے۔ اور اگر بہتر نہیں تو اس کو مجھ سے دور کر دے اور مجھے اس سے دور کر دے اور کوی نعم البدل عطا کر۔ اور پھر مجھے اس پر راضی کر دے۔ سبحان اللہ۔

استخارہ کے لیے کچھ بنیادی باتیں۔

1۔ جس کام کے لیے استخارہ کر رہے ہیں پہلے اس کے بارے میں دنیاوی حساب کتاب اور ظاہری تسلی اچھی طرح کر لیں۔

2۔ اگر دنیاوی تسلی کے مطابق وہ کام ٹھیک ہی نہیں تو استخارہ نہیں بنتا۔ آپ وہ کام نہ کریں۔

3۔ اگر ظاہری طور پر سب ٹھیک لگ رہا ہے تو اللہ کا نام لیں اور کر لیں وہ کام۔ استخارہ کرنا فرض یا واجب نہیں ہے۔ اکثر لوگ صرف غلط استخارہ کی وجہ سے اپنے بنے بنائے کام خراب کر لیتے ہیں۔

4۔ لیکن اگر آپ تسلی کے بعد بھی استخارہ کرنا چاہتے ہیں کہ کوی چھپی بات نہ ہو اور اللہ کی برکت شامل ہو جاے تو اس سے بہتر کیا ہو سکتا ہے۔

5۔ استخارہ کا جواب دو صورتوں میں ظاہر ہوتا ہے۔ ایک یہ کہ دنیاوی حالات ایسے اللہ پاک کر دیتا ہے کہ جس کے بعد آپ پر چھپی باتیں واضح ہو جاتی ہیں اور آپ کو فیصلہ کرنے میں آسانی ہوتی ہے۔ دوسرا یہ ہوتا ہے کہ آپ کا دل ایسا ایک طرف فائنل اور مطمئن ہو جاتا ہے کہ کوی گنجائش ہی نہیں رہتی فیصلہ کرنے میں۔

6۔ اگر یہ دو صورتیں پیدا نہیں ہوی تو میرے نزدیک آپ کا استخارہ ٹھیک ہوا ہی نہیں۔ کیونکہ دعا کے آخری الفاظ ہیں کہ “اور مجھے اس پر راضی کر دے”۔ اور اللہ پاک ایسا دل مطمئن کر کے راضی کرتے ہیں کہ کوی جواب نہیں۔

7۔ دل مطمئن ہونے اور فیصلہ کرنے کے بعد دعا چھوڑ نہ دیں بلکہ جاری رکھیں، اس سے کام آسان ہو گا اور برکت ہو گی۔

8۔ استخارہ خود کیا جاتا ہے، کسی اور سے نہیں کروایا جاتا۔

9۔ استخارہ دو چیزوں یا دو فیصلوں میں سے کسی ایک کو چننے کے لیے نہیں کیا جاتا۔ بلکہ کوی ایک چیز یا فیصلہ ذہن میں رکھ کر استخارہ یعنی اللہ سے مشورہ کیا جاتا ہےکہ کیا یہ کام میرے لیے بہتر رہے گا۔ اگر دو چیزوں میں سے فیصلہ کرنا ہو تو ان دو چیزوں میں سے جو دنیاوی تسلی کے مطابق زیادہ بہتر لگ رہی ہے صرف اس کے لیے استخارہ کریں۔ اگر دو چیزیں دنیاوی حساب سے برابر ہیں تو پھر پہلے ایک کے لیے استخارہ کریں پھر دوسری کے لیے۔ اگر پہلی چیز کے استخارہ سے دل و دماغ راضی ہو گئیے ہیں تو بس کافی ہے، دوسرا استخارہ نہ کریں۔

10۔ استخارہ کرنے کے بعد اگر اس پر عمل نہ کریں تو شرعی طور پر پکڑ نہیں ہو گی۔ لیکن وہ کیسا شخص ہو گا جو اللہ سے مشورہ کرے اور اللہ کے جواب سے اس کا دل و دماغ مطمئین ہو جاے اور پھر بھی وہ اس پر عمل نہ کرے!! اور اگر دل و دماغ مطمئین نہیں ہوے تو میرے نزدیک استخارہ ہوا ہی نہیں۔

11۔ استخارہ کا جواب خواب میں آنے کی کوی حقیقت نہیں ہے۔ اگر اتفاق سے کوی خواب آ بھی جاے تو ضروری نہیں کہ اس میں استخارہ کا جواب ہو۔

12۔ خواب ایک نعمت ہے، خواب میں راہنمای ہو بھی سکتی ہے۔ لیکن خواب کا مطلب خود سے نہ سمجھیں، بعض خوابوں کے مطلب ظاہر سے بالکل الٹ ہوتے ہیں، جیسے رونے کا مطلب خوشی اور مرنے کا مطلب زندگی۔ کسی صاحب علم سے مطلب پوچھیں۔ لیکن پھر بھی استخارہ کا جواب حالات ظاہر ہونے اور دلی اطمینان و فیصلے کی صورت میں ہی ہو گا۔

روحانی مشورہ: جو کسی دوسرے نیک بندے یا صاحب نظر سے کروایا جاتا ہے اسے روحانی مشورہ کہتے ہیں۔روحانی مشورہ بھی سنت مبارکہ ہے، صحابہ کرام حضور صل اللہ علیہ وآلہ وسلم سے مشورہ مانگا کرتے تھے، اور حضور مشورہ عنایت فرمایا کرتے تھے۔

روحانی مشورہ کے لیے کچھ بنیادی باتیں۔

1. روحانی مشورہ کسی ایسے شخص سے لیں جس پر آپ کو اعتماد ہو۔ اور ایک ہی شخص سے ایک ہی دفعہ لیں۔ بار بار مختلف لوگوں سے مشورہ کروائیں تو پھر روحانی مشورہ آپ کے لیے کام کرنا چھوڑ دیتا ہے اور برکت نہیں ہوتی۔ کیونکہ نیک بندے اللہ کا وسیلہ ہوتے ہیں اور وسیلوں (پر اعتماد نہ کر کے) ان کی قدر نہ کرنا ناشکری ہوتی ہے۔ اس لیے اسی شخص سے کروائیں جس پر اعتماد اور یقین ہو۔ ورنہ کسی سے لیں ہی نہ روحانی مشورہ۔

2. روحانی مشورہ دینے والوں کی اپنی اپنی نظر، اپنا اپنا طریقہ اور اپنی اپنی زبان کی تاثیر ہوتی ہے۔ اگر کسی صاحب علم نے کہہ دیا ہے کہ یہ کام کر لیں اللہ برکت دے گا۔ تو اس کا مطلب ہے کہ صاحب علم شخص نے دیکھ بھی لیا ہے، نظر بھی کر دی ہے اور اللہ سے دعا بھی کر دی ہے، اور انہیں یقین ہے کہ اللہ پاک ان کی دعا کی لاج رکھے گا۔ بعض اوقات ایسا بھی ہوتا ہے کہ اللہ اپنے کسی نیک اور پیارے بندے کے کہہ دینے سے ہی اس کام میں برکت ڈال دیتا ہے۔

3. روحانی مشورہ بھی دنیاوی حساب کتاب کرنے کے بعد ہی کروائیں۔ دنیاوی تسلی کے جو اصول اوپر بیان کئیے ہیں وہ یہاں بھی لاگو ہیں۔

4. ہم لوگ کیا کرتے ہیں کہ دنیاوی تسلی ابھی کی نہیں ہوتی اور پہلے ہی استخارہ یا روحانی مشورہ کروا لیتے ہیں۔ پھر جواب ہاں میں آنے کے بعد ہم میں اتنا ایمان ہوتا نہیں کہ اگر ظاہری حساب کتاب میں کوی چھوٹی موٹی بات ظاہر ہو بھی گئی ہے تو حوصلہ رکھیں، استخارہ ہاں میں آیا ہے تو کوی فرق نہیں پڑتا کسی چھوٹی بات سے۔ الٹا ہم استخارہ کو برا بھلا کہنا شروع کر دیتے ہیں۔ اس لئیے استخارہ یا روحانی مشورہ پوری دنیاوی تسلی کرنے کے بعد کروائیں۔ اللہ ہم سب کو نافع علم اور صحیح عمل عطا فرماے۔

ہم سے روحانی مشورہ لینے کے لیے دنیاوی تسلی اور ہوم ورک کرنے کے بعد اس لنک سے رابطہ کریں